2011/04/14

"On line erreputazioa marka baten itzal digitala da"

Miguel de Fresno adituak horixe esan du, besteak beste, "On line erreputazioaren kudeaketa"ren inguruko jardunaldian. Euskal enpresen %20 besterik ez dago egun, sare sozialetan.

On line erreputazioa izan da ostegun honetan, apirilak 14, EHUko Leioako Kanpusean ospatu den Komunika 2011 jardunaldien ardatza. eitb.com izan da topaketaren laguntzaileetako bat.

Social Media arloko hainbat adituk on line erreputazioa zer den, datuak nola monitorizatzen diren eta hori guztia nola kudeatzen den azaldu dute Zientzia eta Teknologia fakultateko Paraninfoan, dozenaka ikasle eta sektoreko adituren aurrean.

Euskal enpresen %20 bakarrik daude sare sozialetan

Igor San Roman Matxain sare sozialetako aholkulari eta Sozialitaseko sortzaileak Euskal Herriko enpresek on line erreputazioari ematen dioten garrantziari buruzko ponentziarekin eman dio hasiera Komunika jardunaldiari. San Romanek ohartarazi duenez, "sarean egon ala ez egon, gutaz hitz egingo dute; beraz, hobe da egotea edo, gutxienez, gutaz zer esaten duten jakitea".

Dena dela, badirudi gure enpresak ez direla oraindik behar bezala sartu arlo honetan. Izan ere, "euskal enpresen %20 bakarrik daude sare sozialetan eta %10a bakarrik modu kudeatuan".

Horregatik, hainbat erreminta erabiliz, "sarean gure markari buruz egoten diren elkarrizketak" detektatu beharra dagoela esan du eta elkarrizketa horietan parte hartuz, komunikazioa, gardentasuna eta feedbacka lortu. Enpresek hori eginez gero, onurak ikusiko dituzte arlo guztietan.

Enpresak ez dira eurek uste dutena, jendeak eurei buruz irizten diotena baizik

Orreaga Aranburu Overaliako Social Media Analystak entzuketa aktiboa egin beharra dagoela nabarmendu du, "enpresak ez baitira eurek uste dutena, jendeak eurei buruz irizten diotena baizik".

Aranburuk azaldu duenez, "gutaz nork hitz egiten duen jakin beharra daukagu, zer dioten, non hitz egiten duten.... garaiz erantzuteak arazoak saihestu baititzake eta era berean, gure lehiakideekin alderatuta nola gauden jakiten lagun dakiguke". "Oro har, gure sektorean gertatzen dena jakin behar dugu, azken berriak ezagutu, elkarrizketetan parte hartu eta jendearen zalantzak argitu, horrek aditu bezala posizionatzen baikaitu eta jendearen konfiantza irabazten dugu" gaineratu du.

Enpresak batek bere on line erreputazioa nolakoa den jakiteko zer monitorizatu beharra daukan, eta horretarako erabili daitezkeen erreminten berri eman ostean, ondorengo hausnarketa utzi du: "ez dago erreminta perfekturik. Giza faktorea erabat beharrezkoa da".

On line erreputazioa markaren itzal digitala da

Miguel de Fresno soziologian doktore eta Quor 2.0.ko zuzendari orokorrak, bere aldetik, on line erreputazioa kudeatzeko kontuan izan behar diren irizpideei buruz hitz egin du. Hain zuzen ere, hiru elementu uztartu behar direla esan du: teknologia, marketinga eta soziologia edo antropologia.

"Zergatik da horren garrantzitsua on line erreputazioa?" galdetu du: "Gehienok ez garelako webgunera zuzenean joaten". Hori bai, sarean "zarata asko" dagoela nabarmendu du eta lehen gauza "ordena" jartzea dela, "metodo zientifikoak" erabiliz.

Ironia handiz community managerren hainbat jarrera kritikatu ondoren: "unean uneko elkarrizketa ez da beharrezkoa; CMaren lana ez da gasolina botatzea, community managerrak suntsipen handiko armak dira"... garbi utzi nahi izan du on line erreputazioa "markaren itzal digitala" dela eta beraz, community managerrak erabaki behar duela "kontrolik gabe zabaltzen utzi ala kudeatzen hasi".

On line erreputazioa zaintzeak enpresaren eraginkortasuna eta etekinak hobetzen ditu

Carmen Pons, Shackleton Buzz&Press enpresako Social Media eta SEO zuzendariak on line erreputazioaren inguruko proiektu bat martxan nola jarri azaldu du. Abiapuntu gisa garbi izan behar da "Internetek memoria duela, guztia posizionatzen dela eta horrek arrisku bat du".

Ez markak bakarrik, marka horren "aurpegi ezagunek" edo irudiek ere zerikusia dute on line erreputazioan eta horregatik, enpresako kide guztiak eta negozio linea guztiak ere ibilbide berean joan behar direla gaineratu du.

"Malgutasuna behar da behar berrien aurrean, marka garatzen joaten baita denboran zehar" azaldu du eta horregatik, "zentzuz" eta "estrategia batekin" lan egin behar dela nabarmendu du Ponsek. Gauzak horrela, ezustekoen aurrean erantzuten jakin behar den arren, beharrezkoa da protokoloak izatea eta gerta daitezkeen xehetasunak aurreikusita izatea.

Community Managerrak elkarrizketa entzun eta enpresari helarazi behar dio

Manuela Battaglini, Espainiako Komunitate Arduradunen Elkarteko presidenteordeak itxi du aurtengo Komunika jardunaldia, communty managerraren profilari buruz hitz eginez. Hain zuzen ere, jardunaldiaren baitan behin eta berriz atera da pertsona horren profila mahai gainera.

Garai batean izan zezakeen profil teknikoa alde batera utzita, gaur egungo community manager batek izan behar dituen gaitasunak zehaztu ditu Battaglinik: enpatia, entzuteko gaitasuna, komunikatzeko gaitasuna, gardentasuna.... ezaugarri horiek guztiak beharrezko izango ditu sarean bere markaren inguruan dagoen elkarrizketa entzun, jaso eta informazio hori enpresari helarazteko.

Community managerrak enpresa barruan "ebangelizazio" lana egin beharra daukala ere gehitu du eta gizartera bidaltzen dituen mezuak "erabilgarriak edo interesgarriak" izan behar direla; "jada ez du balio ‘ostirala da eta astea amaitzear da’ jartzeak".

Jardunaldiak mahai inguru batekin amaitu da, datorren urtera arte.

No hay comentarios:

Publicar un comentario